Lindås kommune ligg i Nordhordland 25 minuttars biltur frå Bergen sentrum. Her har det budd folk i nær 10000 år, og vi er stolte av dei mange kulturminna vi har heilt frå steinalder, gjennom utviklinga av kystkulturen, heilt fram til i dag. I regi av prosjektet ”Den indre farleia” er det nett gitt ut bok som skildrar dette på ei fin måte (sjå farleia.no).
Kommunen har vakkert natur- og kulturmiljø omkransa av høge fjell og fjordlandskap. Dette byr på mange opplevingar for den som likar å ferdast i friluft på land eller til sjøs, samstundes som kultur- og fritidstilbodet er rikt og i stadig utvikling.
Både næringsliv og innbyggjartal er i sterk vekst. Våre nær 14.000 innbyggjarar bur gjerne i rolege grender, men har rask tilgang på meir pulserande liv m.a. i regionsenteret Knarvik eller i industrimiljøet på Mongstad.
Vi som til dagleg tek i vare det kommunale tenestetilbodet og forvaltninga gjer vårt beste for at innbyggjarar, næringsliv og tilreisande skal ha eit godt inntrykk av kommunen og det mangfald den har å by på.
